നാടിന്റെ ഹൃദയത്തിലെ ബഹദൂര്‍; ഓര്‍മയുടെ മധുരമായ കടംവീട്ടലുകള്‍
പി.കെ.കുഞ്ഞാലുവിന് നാടായിരുന്നു എല്ലാത്തിന്റെയും അടിയില്‍ കിടക്കുന്ന ഊര്‍ജസ്രോതസ്സ്. ഏത് ഉയരത്തിലും നാടിന്റെ വേരാഴത്തില്‍ കാലൂന്നിനിന്ന മനുഷ്യന്‍. സിനിമയുടെ വെള്ളിവെളിച്ചത്തിലേക്കും മദ്രാസിലെ തിരക്കുകളിലേക്കും വണ്ടി കയറുന്നതിന് മുന്നേ കുഞ്ഞാലു, കാല്‍നൂറ്റാണ്ടുകാലം ജീവിതത്തിന്റെ കയ്പുനീരത്രയും കുടിച്ചുതീര്‍ത്തത് കൊടുങ്ങല്ലൂരിന്റെ അകവഴികളിലാണ്. കാരയിലും ഏറിയാടും ചുറ്റുവട്ടത്തും കുഞ്ഞാലു ജീവിക്കാന്‍ പെട്ടപാട് ഒരു സിനിമയിലും കാണാത്തത്ര ചൂടും വേവും നിറഞ്ഞതായിരുന്നു. ആ തിരക്കഥയൊന്നും ഇന്നോളം ഒരു സിനിമയും പകര്‍ത്തിയിട്ടില്ലെന്ന് പറഞ്ഞാലും അതിശയോക്തിയാകില്ല.
കാരയില്‍ എന്ന അന്നത്തെ ഗ്രാമത്തിലാണ് കുഞ്ഞാലു ജീവിച്ചത്. ജീവിച്ചുവളര്‍ന്ന വീട് ഇരുന്ന ഇടം ഇപ്പോഴത്തെ കാര ജങ്ഷനിന്റെ നോട്ടപ്പുറത്തുണ്ട്. വിടെ ഇപ്പോള്‍ കുടുംബാംഗങ്ങളുടെ ഉടമസ്ഥതയില്‍ ബഹദൂര്‍ കണ്‍വെന്‍ഷന്‍ സെന്റര്‍ ആ ഓര്‍മയുടെ അടയാളമായി ഉയര്‍ന്നുനില്‍ക്കുന്നു. ഹൃദയാലുവായ കുഞ്ഞാലു പിറന്നുജീവിച്ച കൊടുങ്ങല്ലൂരിന്റെ വഴികളില്‍ ആവോളം പിന്നെയും കാണാം ഓര്‍മയുടെ പൊട്ടുകള്‍. കാര ജങ്ഷനില്‍ ബഹദൂര്‍ ഗ്രാമീണ വായനശാല അതിലൊന്ന്. തൊട്ടടുത്ത് നവീകരണം കാത്തുകഴിയുന്നു ബഹദൂര്‍ സ്റ്റേജ്. ബഹദൂര്‍ സ്മൃതിയുടെ ഓഫിസും കാരയില്‍ തന്നെ. ബഹദൂര്‍ സ്കൂള്‍ വിദ്യാഭ്യാസം പൂര്‍ത്തിയാക്കിയ ഏറിയാട്ടെ കേരള വര്‍മ ഹൈസ്കൂള്‍. ഇല്ലായ്മകള്‍ നിറഞ്ഞ വിശപ്പിന്റെ കാലത്ത് പല പണികള്‍ ചെയ്തുചെയ്ത് കുഞ്ഞാലു സ്കൂള്‍ വിദ്യാഭ്യാസം പൂര്‍ത്തിയാക്കി. ബഹദൂറിന്റെ ഓര്‍മ കാണാം സ്കൂളിന്റെ കവാടത്തില്‍. ബഹദൂര്‍ ഗേറ്റ്.
പട്ടിണിയുടെ അക്കാലത്ത് എല്ലാത്തിനും ഇടയില്‍ നാടകത്തിന്റെ തിരശ്ശീലയും ഈ നാട്ടകങ്ങളില്‍ ഉയര്‍ന്നുപൊങ്ങി. നാട്ടില്‍ പല സ്റ്റേജുകളില്‍ ബഹദൂര്‍ പല വേഷങ്ങള്‍ കെട്ടിയാടി. നാടൊരുക്കിയ ഈ വേദികള്‍ തന്നെയാണ് ബഹദൂരിലെ നടന്റെ ഉരകല്ല്.
കാര മുതല്‍ കോതപറമ്പ് വരെ നാലു കിലോ മീറ്റര്‍ നീണ്ടുകിടക്കുന്ന ബഹദൂര്‍ റോഡും ജന്‍മനാട്ടില്‍ ആ ഓര്‍മയ്ക്ക് പാതയൊരുക്കുന്നു. ഈയടുത്ത് കൊടുങ്ങല്ലൂരിനടുത്തെ എം.ഇ.എസ് അസ്മാബി എന്‍ജിനീയറിങ് കോളേജ് കുട്ടികളുടെ പഠനത്തിനായി എഡിറ്റിങ് സ്റ്റുഡിയോയും തീയറ്ററും സ്ഥാപിച്ചപ്പോഴും അതിനവര്‍ പേരിട്ടു: ബഹദൂര്‍ സ്റ്റുഡിയോ. സര്‍ക്കാര്‍ സ്മാരകമെന്ന സ്വപ്നം അത്ര അകലെയല്ലാതെയുണ്ട്. സ്ഥലം ലഭ്യമാക്കുന്ന മുറയ്ക്ക് സ്മാരകം പണിയാന്‍ സര്‍ക്കാര്‍ സന്നദ്ധത അറിയിച്ചിട്ടുണ്ട്.
നാട് ഈ ഇരുപത്തിയഞ്ച് വര്‍ഷത്തിനിപ്പുറവും ബഹദൂറിനെ സ്വന്തം മകനെപ്പോലെ ഓര്‍ക്കുന്നു, പരിഗണിക്കുന്നു. ഏറിയാട്ടും കാരയിലും വെറുതേ നടന്നാല്‍ ഈ തലമുറയും നിങ്ങള്‍ക്ക് പറഞ്ഞുതരും, ബഹദൂര്‍ എന്ന മനുഷ്യനെക്കുറിച്ച്. ബഹദൂറിന്റെ ഓര്‍മയില്‍ ട്രസ്റ്റും മറ്റും ജീവസ്സോടെ നിലനിര്‍ത്തി ജീവതകാരുണ്യ പ്രവര്‍ത്തനങ്ങളും തുടരുന്നു നാട്ടുകാരും ഉറ്റവരും മറ്റ് കുടുംബാംഗങ്ങളും. അതുതന്നെയാണ് ഈ മനുഷ്യസ്നേഹിക്ക് ലഭിക്കാവുന്ന ഏറ്റവും വലിയ സ്മാരകം. നാട്ടാരെ ഹൃദയത്തോടുചേര്‍ത്ത ബഹദൂറിനെ നാടും ഹൃദയത്തിന് ചാരെത്തന്നെ പാര്‍പ്പിക്കുന്നു, ഏതോ കടം വീട്ടാനെന്ന പോലെ.